ఎన్నిసార్లు ఎన్నికలు జరిగినా బ్రాహ్మణులు టీడీపీకే అండగా నిలవాలి: 'మహానాడు'లో బుచ్చి రాంప్రసాద్

రాబోయే రోజుల్లో ఎన్నికలు ఎన్నిసార్లు జరిగినా బ్రాహ్మణ సమాజం అంతా తెలుగుదేశం పార్టీకే అండగా నిలవాలని బ్రాహ్మణ కార్పొరేషన్ ఛైర్మన్ బుచ్చి రాంప్రసాద్ పిలుపునిచ్చారు. మంగళగిరిలోని టీడీపీ కేంద్ర కార్యాలయంలో జరుగుతున్న మహానాడు కార్యక్రమంలో ఆయన ప్రసంగించారు. గత ప్రభుత్వానికి, ప్రస్తుత కూటమి ప్రభుత్వానికి మధ్య ఉన్న తేడాను వివరిస్తూ, చంద్రబాబు నాయకత్వంలోనే బ్రాహ్మణులకు గౌరవం, సంక్షేమం అందుతున్నాయని స్పష్టం చేశారు.

గత వైసీపీ ప్రభుత్వ హయాంలో బ్రాహ్మణులపై, హిందూ దేవాలయాలపై మునుపెన్నడూ లేనంతగా దాడులు జరిగాయని బుచ్చి రాంప్రసాద్ ఆరోపించారు. చంద్రబాబు అభివృద్ధి వికేంద్రీకరణ చేస్తే, జగన్మోహన్ రెడ్డి అరాచక వికేంద్రీకరణ చేశారని విమర్శించారు. కాకినాడలో పూజారిపై వైసీపీ కార్పొరేటర్ దాడి, భీమవరంలో పూజారి జంధ్యాన్ని లాగి కొట్టడం, బిట్రగుంటలో పూజారిని చావబాదడం వంటి ఘటనలను ఆయన గుర్తుచేశారు. రామతీర్థం, అంతర్వేది ఘటనల సమయంలో నాటి ప్రభుత్వం వ్యవహరించిన తీరును, తిరుమల లడ్డూ ప్రసాదంలో కల్తీ నెయ్యి వాడటం, తలనీలాల స్మగ్లింగ్ వంటి అపచారాలను ఆయన ప్రస్తావించారు.

కూటమి ప్రభుత్వం అధికారంలోకి వచ్చాకే రాష్ట్రంలో బ్రాహ్మణులు సంతోషంగా, ప్రశాంతంగా ఉన్నారని తెలిపారు. చంద్రబాబు 2014-19 మధ్య కాలంలోనే 'బ్రాహ్మణ కార్పొరేషన్', 'కోపరేటివ్ సొసైటీ'లను ఏర్పాటు చేశారని గుర్తుచేశారు. బ్రాహ్మణుల సమస్యలను తెలుసుకుని, వాటిని లోకేష్ తన మేనిఫెస్టోలో చేర్చి ఇప్పుడు అమలు చేస్తున్నారని వివరించారు. బ్రాహ్మణ కోపరేటివ్ సొసైటీకి చంద్రబాబే బ్రాండ్ అంబాసిడర్‌గా ఉన్నారని, ఆయన చొరవతో సొసైటీ డిపాజిట్లు రెండేళ్లలో రూ. 32 కోట్ల నుంచి రూ. 64 కోట్లకు పెరిగాయని వెల్లడించారు.

కూటమి ప్రభుత్వం బ్రాహ్మణుల సంక్షేమానికి తీసుకుంటున్న చర్యలను ఆయన వివరించారు. వేదం చదివే విద్యార్థులకు 'యువగళం' కింద నెలకు రూ. 3,000 స్టైఫండ్ ఇస్తున్నామని, ఆలయాల్లో ఆగమశాస్త్రం ప్రకారం పూజలు జరిగేలా జీవో తెచ్చామని అన్నారు. తిరుపతితో సహా అన్ని దేవాలయాల ట్రస్ట్ బోర్డులలో బ్రాహ్మణులకు స్థానం కల్పిస్తూ ఆర్డినెన్స్ తెచ్చామన్నారు.

రూ. 50 వేల లోపు ఆదాయం ఉన్న చిన్న దేవాలయాల్లో పూజారుల వేతనాన్ని రూ. 5 వేల నుంచి రూ. 10 వేలకు పెంచామని, ధూపదీప నైవేద్యాల ఖర్చును రూ. 15 వేలకు పెంచామని తెలిపారు. రాష్ట్రవ్యాప్తంగా 70 చోట్ల అపర కర్మల నిర్వహణకు వసతులు నిర్మించామని, ఎండోమెంట్ పరిధిలోని పూజారులకు ఒకటో తేదీనే జీతాలు ఇచ్చేందుకు చర్యలు తీసుకుంటున్నామని బుచ్చి రాంప్రసాద్ పేర్కొన్నారు.